Mintga persuna che ha dapi lung temp in tinnitus sto vegnir intercurida minuziusamain d’in medi. Ils motivs per in tinnitus èn darar organics, ma igl è necessari d’excluder las paucas raschuns seriusas. Igl è impurtant da savair ch’il tinnitus n’è betg in indizi per in’autra malsogna privlusa.

In tinnitus acut po svanir da sasez. Cun in tractament immediat s’augmentan las schanzas da guariziun per 20%.

Enfin uss n’èsi anc betg pussaivel da guarir durablamain in tinnitus cronic, ni cun medicaments, ni cun in’operaziun u metodas alternativas, sco p.ex. l’acupunctura.

L’alternativa è la reabilitaziun dal tinnitus, cun la quala Vus chattais danovamain plaschair da viver, malgrà il tinnitus.

Na. L’intensitad d’in tinnitus è adina tranter 5 e 15 decibels sur il cunfin d’udida da la persuna pertutgada. Tscherts facturs pon però augmentar la percepziun subjectiva dal tinnitus. Tranter auter èn quai stress, stancladad, canera, mal il dies e problems da la massella.

Sch’insatgi reagescha a moda ipersensibla sin canera, discurr’ins dad in’iperacusia. Sco il tinnitus sa sviluppa era ella sin fundament d’in disturbi da l’elavuraziun dals signals acustics en il tscharvè. Las ramurs percepidas intensivamain provocheschan sintoms vegetativs: ferm battacor, suadas, panica, tema. La persuna pertutgada po per curt temp percepir pli fermamain in eventual tinnitus

In tinnitus (ramurs en las ureglias) è ina percepziun acustica senza ch’i dat ina funtauna da tun externa. Ins differenziescha tranter il tinnitus subjectiv, fitg derasà e betg perceptibel per l’ambient, ed il tinnitus objectiv, chaschunà da tuns a l’intern dal corp, sco p.ex. il sang che cula, sin fundament d’ina anomalia da las avainas.

Restai calm e pruvai da durmir. Sch’il tinnitus è l’auter di anc adina qua, consultai il pli svelt pussaivel Voss medi da chasa u in spezialist ORL. Sin fundament da las conuschientschas actualas vegn in tinnitus acut tractà sco ina sperdita andetga da l’udida. Durant il temp da guariziun èsi bun d’avair ruaus e da recrear bler. Voss spezialist ORL vegn a far ina diagnosa exacta.

Sch’in tinnitus acut na svanescha betg pli, discurr’ins dad in tinnitus cronic. 90% da las persunas cun in tinnitus pon viver bain cun il disturbi. In tractament n’è damai betg necessari.

Pir cura che las ramurs en las ureglias influenzeschan negativamain il plaschair da viver, èsi necessari da far ina terapia individuala. La finamira è da puspè pudair giudair la vita professiunala e privata, malgrà il tinnitus.

Ils effects negativs dal tinnitus sa reduceschan tras la cussegliaziun e l’infurmaziun detagliada e l’agid a sasez. Las gruppas d’agid a sasez da la LTS ed il team da terapia, che sa cumpona dal spezialist ORL, da psicoterapeuts, da terapeuts da l’udida e d’acustichers d’apparats d’udida sustegnan ed accumpognan Vus.

La LTS As dat gugent las adressas dals spezialists.

Las raschuns da las ramurs subjectivas en l’ureglia èn anc nunenconuschentas. In tinnitus po esser la consequenza d’ina canera intensiva da curta u lunga durada, d’ina sperdita andetga da l’udida, d’in virus u da la malsogna Morbus Ménière. Savens chaschuna stress in tinnitus. El è però darar in sintom per in disturbi organic da l’apparat d’udida central en il tscharvè. Problems da la spina dorsala u da la massella pon provocar la malsogna u la rinforzar.

Na consultai betg divers medis u terapeuts en la speranza ch’in dad els possia tuttina anc guarir Voss tinnitus. Nagin tinnitus n’è tuttina sco l’auter. Perquai na datti ni in tractament, ni in medicament general cunter tinnitus. Da las numerusas pussaivladads da tractament datti bain singuls rapports da success, ma nagina metoda medicala u betg medicala na po gidar tut las persunas pertutgadas.

Il tractament è il medem sco per in tinnitus cronic. La suletta differenza è che las ramurs, che vegnan emessas dals generaturs da ramurs u en la terapia acustica, vegnan dosadas bler pli precautamain. Ina protecziun da l’udida duess il pazient però mo purtar en lieus canerus. Gia suenter paucs mais supporta la gronda part da las persunas pertutgadas puspè la canera quotidiana e po schizunt ir ad in concert.